معايير الحلال و الحرام في الرزق اختلفت

زي ما تكون المعايير اختلفت

بمعنى كنت بتكلم مع واحد اعرفه في مصر في الاجازة الاخيرة عن معايير الحرام و الحلال في الرزق

يعني طبعا مش عباقرة او فقهاء عشان نعرف بالضبط ايه هي المعايير بس الحلال بين و الحرام بين طبعا

قبل ما ادخل في الموضوع ... هحكيلكم نبذه فيما قبل

انا لما سافرت الكويت بعديها بسنتين كنت وصلت مصر في اول اجازة

انا بطبيعة عملي محاسب مش حاجه تانية .. و المحاسب اساسا وظيفتة ادارة اموال الشركة و حساب المصاريف و الايرادات الخ الخ

بس المحاسب ده مش في الكويت بس .. يعني هناك محاسبين في مصر كمان

بس تفرق ....

المحاسب في الكويت بيتعامل مع الشركات سواء موردين او عملاء و قليل جدا ما يتعامل مع الحكومه في ايجار قسيمة مثلا او اشتراك في اتحاد الصناعات .. حاجات بسيطه معروفة

المحاسب في مصر بيتعامل مع الحكومة و مع الموردين و العملاء .. الحكومه في الضرائب و المخالفات

لكن في اجازتي الاخيرة في مصر لقيت ان فيه حاجات تانية بيتعامل معاها المحاسب في مصر .. الرشاوي و الوسايط و المحسوبية !!

لما سألت صاحبي و اسمه وليد ( شغال محاسب في شركة ) بتدخل ضمن ايه .. قالي " مصاريف حكومية .. مصروفات ضرائب .. اي حاجه مش هنعملها حساب لوحدها يعني "

طبعا مش عايز اقولكم اني سكت .. عشان ده حصل لمدة خمس دقائق بس و رجعت اسأله تاني عن موضوع الرشاوي

- صاحب الشركة عارف انكم بتخلصو معاملاتكم بالرشاوي ؟

- طبعا يا عم الحاج

في الكويت مفيش رشاوي ... فيه وسايط صح .. يعني عندك واسطه معرفه من طرف واحد كويتي يخلص لك المعاملة

بس مثلا تدخل على واحد متعرفهوش و تديلو كام دينار عشان يمشي لك معاملة و لا حاجه ؟؟ لاء طبعا مفيش كده !

رجعت تاني سألته :

- طب صاحب الشركة اكيد عارف ان الرشاوي فيها حرمانية .. يعني المكسب فيه جزء من الحرام

- يا عم حرام ايه ؟؟؟ هو بقه فيه حاجه اسمها حرام و حلال .. و كمان الضرورات تبيح المحظورات

- بس الراشي و المرتشي .. ده حديث بين جدا يعني

- يا عم دماغك .. الشيوخ اباحو الحاجات ده مادام مش هتخلص معاملاتك من دونها

انا سكتّ ... مش اقتناع .. و لكن عشان اواجه النظرة الجديدة ده

انا كان عندي قبل ما اسافر محل انترنت كافية فتحته في مصر عشان آكل منه عيش و كده ...

كنت بروح اخلص معاملاتي و حاجاتي بدون ما ادفع رشاوي ..

المعاملة اللي بالرشوة تخلص في يوم كنت انا بخلصها في يومين !!

انا عندي اقتناع ان الرشوة مسرعه للامور و ليست ميسرة للامور .. يعني تسرع لك الموضوع مش تخلصهولك !

عشان المرتشي بطبيعه حاله جبان . مش هيحط نفسه في موضع مسئولية ..

او بصراحة انا مجربتش يعني ارشي واحد في موضوع عسير و الحمد لله

رجعت تاني أسأله :

- طب ما هو الراتب بتاعك كده في نوع من انواع الشبهات مادام انت عارف ان مكسب الشركة ده فيها نوع من الحرمانية

- يا عم انت هتقرفني .. ده انا الحمد لله اني شغال كويس مش بسرق او بشتغل في الناس عشان حوار و لا حاجه

- على فكرة معايير الحرام و الحلال في الرزق اختلفت عندك ...

- اختلفت عند المصريين كلهم يا باشا ... و لا عايزني آقعد جنب امي ؟؟؟

.

.

فيه موقف تاني ... بيني و واحد تاني اسمه محمد تانجو مدرس .. او بيتمنى انه يبقى مدرس

بيندم ندم كبير عشان ساب شغلانة كاشير في البارادايس عشان كان بيقبض من الزباين فلوس الخمر اللي كانو بيشربوه !

قال " يا ريتني فضلت في الشغلانه ده لغاية ما يجيلي التعيين و اسيبها و اتوب لله بقه "

قلت له اللي انت عملته صح .. عشان الشغلانه كان فيها نوع من انواع الحرمانية الواضحه يعني

و هي ان جزء من ايرادات الخمر اللي بيبيعوها بيدخل في راتبه الشهري ...

لكنه كان ندمان عشان هو دلوقتي بيدور على شغل و مش لاقي طبعا كالمعتاد !

احمد محرم و ده صاحبنا شغال محاسب في الميناء ( عندنا في اسكندرية طبعا ) كان معارض أشد الاعتراض

و شايف ان محمد غلطان جدا عشان ساب الشغل ده و قعد في البيت

- اومال هيصرف منين ... كان فضل فيها أحسن ما يشحت و مش لاقي حق الشاي اللي يشربه على القهوه .. مش احسن ما يمد ايده كل اسبوع لابوه يقولو و النبي قرشين ؟

و تكررت الجملة الشهيرة جدا " الضرورات نبيح المحظورات "

- على فكرة معايير الحلال و الحرام في الرزق عندكم اختلفت !

- ايوه ما هو اللي ايده في المية مش زي اللي ايده في النار .. يا خي سيب الكويت و تعال عيش معانا هنا و انت هتشوف !

طبعا مردتيش عليه .. انا فكرته بالسايبر بتاعي و المعاملات اللي كنا بنخلصوها .. بس مكنش مقتنع طبعا

- ده كان بيكسب في الشهر فوق الـ 2500 جنية خليه دلوقتي قاعد جنب امه لغاية ما تيجي له مدرس بـ 200 جنية في الشهر !

.

.

.

الحرام بيّن و الحلال بيّن .... الحرام بيّن و الحلال بيّن

يمكن مش في عصرنا ده !؟؟؟