إن لم يخجل الرجلُ من شيء ... أفلا يخجل من أنه لا يخجل؟

النص الأصلي بواسطة خالد عبد القادر عن مصطفى صادق الرفاعي
إن لم يخجل الرجلُ من شيء ... أفلا يخجل من أنه لا يخجل؟

فكرتني بالمقولة الأبوية الشهيرة .
انت مكسوف من ايه ؟ هو فيه راجل بيتكسف!!
هو فيه راجل بيعيّط برضو ؟؟
.
.
و انا صغير كنت حاطط في خيالي صورة ان الناس الكبار كلهم أبهات ( جمع أب )
و ان ( الأبهات ) كلهم عبارة عن ناس كبيرة مش بتعيّط و لا بتتكسف!!!
و انا عمال أكبر في السن بدأت المباديء اللي انا عايش فيها ده تختفي
في ( أبهات ) بتتكسف ! و فيه كمان ( أبهات ) بتعيّط !
لما سمعت ان سيدنا ( عثمان بن عفان ) كان بيستحي لدرجة ان الملائكة تستحي منه
استغربت جدا ...
ما هو ثالث الخلفاء الراشدين كان بيتكسف اهو !!!
يبقى الموضوع مش موضوع رجولية او غيره !
و لما تروح الكعبه .. و تشوف ناس رجاله كبار بتبكي من غير سبب كده
رافعين ايديهم بيدعو و فجأه تلاقيهم بيبكو !!
عند الترب - المقابر
الراجل واقف هناك اهو عامل نفسه مش بيعيط بس دمعه بينزل
بكاء الرسول على زوجته و على عمه ... و طبعا على حاجات كتير
يبقى الموضوع مش موضوع رجولية او غيره !
انا بعترف اني راجل بعيّط لاقل شيء .. و بتكسف من كل شيء !
مش عيب ...
انا لما اشوف فيلم مؤثر .. عنيا بتدمع !!!
و لما اشوف عيل صغير بيعيط ... قلبي بيتقطع !
لما اكون ماشي في الشارع لو جت عيني في عين بنوتة .. بتكسف اوي !
لما آجي اركب الأسانسير و تكون بنتين عايزين يركبو .. استحالة اركب معاهم
لما يطلب مني حد اي حاجه .. استحاله ما اعملهاش له !
لما أكون باكل و واحد شافني ... لازم اديلو من الاكل اللي معايا اتكسف آكل لوحدي
صحابي لما كانو بيشجعوني على حوارات البنات في الكلية
يقولولي لازم تكون جريء ... بس انا نيلة و بتكسف بسرعة جدا !
و لما اتكلم معرفش اقول كل اللي انا عايز اقولو
و بستغرب اوي من العيال اللي بيتكلمو بطلاقة اوي دول مع ناس اول مرة يعرفوهم
انا لما اقف مع واحد لسه ماعرفهوش كويس بكون بتكلم معاه على الاد كده يعني
مرة سمعت واحد على البحر بيعاكس بنوته كده بمعاكسة بذيئة جدا !
و الله العظيم بذيئة لدرجه ان جسمي اتقشعر منها ..
بس البنت بصت له بدلال كده و حركت راسها بطريقة ( يا سم ! )
حسبنت الله و ضربت كف على كف !

النص الأصلي بواسطة خالد عبد القادر
إن لم يخجل الرجلُ من شيء ... أفلا يخجل من أنه لا يخجل؟

ساعات كتير جدا بتكسف من جرأتي في بعض الأشياء التي تحتاج جرأة
يعني مثلا غلاسة ابن خالتي في طلب حاجات عزيزة عليا ..
او شغل مثلا لما يكتر عليا رغم انه مش شغلي ...!
برفض على استحياء كده ...
بكون شكلي زي ما قلت منار كده في مدونتها

النص الأصلي بواسطة منار
“الكائنات التي اعتدنا على هدوئها
فإنها تصدمنا بكلامها إذا ما تكلمت”
http://mzgraphics.com/white-ink/?page_id=20

و كأن قولي لكلمة ( لاء ) لحاجة مش شغلي أساسا .. بقى عيب!
و موضوع الكسوف ده جاب لي مشاكل كتيرة جدا في الشغل
لما أرفض ببطيء كده ..
و اشوف مثلا نظرات زمايلي اللي بتنظر لي بإستغراب شديد
ببقى عايز الأرض تنشق فعلا .. و تبلعني

النص الأصلي بواسطة خالد عبد القادر
إن لم يخجل الرجلُ من شيء ... أفلا يخجل من أنه لا يخجل؟

السكرتير الموجود في الشركة عندنا دلوقتي عنده شيء غريب جدا
هو تقبله للنقد السيء الغير هادف و الرفض من الغير بطريقة مرضيه جدا!
بحس ساعات كتيره اوي انه فعلا معندوش دم !!!
ممكن يطلب شيء ( شخصي و ليس في العمل ) من احد الموظفين أكثر من عشر مرات ورا بعض و في كل مرة يتم الرفض بطريقة قاسية وواضحة !
انا لو طلبت شيء ( و ده نادر الحدوث جدا يعني ) استحالة اطلبه مرتين ورا بعض
حتى و ان وافق على المرة الاولى!
ساعات بشوفو و الناس بترفض له اشياء كتيرة و بيألثو عليه كمان
اقولو ( يا عم الحاج اتكسف من نفسك شويه و خالي عندك ذرة دم !! )
لكن اكتشفت ان نظرته في الحياة كده
و هو انه مادام حاجه فيها مصلحه له .. مش مهم الاحراج !!!
و ده طبعا خطأ جدا
فيه مثل مشهور اوي أخدته من بابا مساه الله بالخير و متمسك بيه لحد الآن

انا اهين قرشي و لا أهين نفسي

حتى لو ماكانش معايا .. عمري ما أطلب من حد ابدا !
أيه بي سي معاملة مع الغير .. إيه بي سي حياة !

النص الأصلي بواسطة خالد عبد القادر
إن لم يخجل الرجلُ من شيء ... أفلا يخجل من أنه لا يخجل؟

صدقت يا مصطفى صادق الرفاعي
صدقت ...