ينفع تاني نرجع من جديد ؟
لا تعرفيني و لا اعرفك؟
اشوفك بس ابتسم
و اهرب من بعيد
أصل المشاعر شيء عجيب
و الحب بحر يخوّف
بحر غويط!
و كلامنا من تاني يكون خفيف؟
بدايته سلام
و نهايته سلام
و ما بين الاتنين برضو سلام
مفيش احلام ما بينا
و لا فيه كلام
لا فيه بحتاجلك..
و قلبي فيه ما يكونش وحيد ؟
ينفع تاني نرجع من جديد ؟
كل ما اشوفك.. اقول لو اطولك
و لا اقولش انت ملكي!
و لا اقولش انا مش غريب
و لما اسيبك و امشي
ماقولش هقبالك امتى من جديد ؟
لا هفكر فيكي و انسى كياني
مش هستناكي ..
هبقى اناني
و أهرب من بعيد !!
ينفع تاني نرجع من جديد ؟
مش موجوده في خيالي
و لا لما اغمض عيني القاكي
أعيش من تاني وحيد
مش عايز افرح بيكي
مش عايز بعيونك اكون سعيد!!
أصل المشاعر شيء عجيب
و الحب بحر يخوّف
بحر غويط!
ارجوك عني ابعدي
خالليكي هناك بعيد
بقيتي كل حاجه في حياتي
في مرايتي لما اشوف عيوني
و في موس حلاقتي
كمان في ريحة كفوفي
بشوفك حتى في سطح الشاي بتاعي
بشوفك في لونه بالحليب
ينفع تاني نرجع من جديد ؟
لا اعرفك و لا تعرفيني ؟
اشوفك بس ابتسم
و اهرب من بعيد
أصل المشاعر شيء عجيب
و الحب بحر يخوّف
بحر غويط!
.
كامل التقدير,,,
هناك 12 تعليقًا:
بجد بجد حلوه اوى
نجاه قالتها زمان لا العاشق مرتاح ولا الخالى مرتاح
بس لو تشيل حكايه موس الحلاقه هتبقى جامده حاساه مش ماشى مع الموضوع
يا حرة :)
ازيك ؟
كويس جدا انها عجبتك
و شكرا على ملاحظتك في (موس الحلاقة) بس هتصدقيني لو قلت لك اني بشوفها في انعكاسات الضوء على الموس؟
بشوفها في الندى اللي بيتجمع حولين صورتي في المرايا ؟
و بفتكرها كل ما آجي أضحك و هي مش معايا؟
مش حكاية انها مش ماشية مع الموضوع .. الحكاية اني حاسس انها (هي) مش ماشية مع حياتي كلها !!!
منورة .. يا حرة :)
عجبتني اويي من ساعه ما نزلتها في الفيس بوك بجد
ومع انها حلوة اوي واي وحده لو سمعتها هتقولك وماله مينفعش ليه
بس معرفش الحاله اللي في النص خلتني اقول انه عمره ما هينفع تاني
كآبه تقدر تقول
بس هو كده
مبقاش ينفع وخلاص :):)
كن بخير
ايمان فعلا انت شايفه صح
هي فعلا ماينفعش
رغم انه سؤال متألم !
( ينفع تاني نرجع من جديد؟ )
عامل زي سؤال ( ينفع الزمن يرجع تاني؟)
لا ده ينفع و لا ده ينفع!!
بحب فيكي نظرتك الجميلة لقلب النص
و بتفهمي الكاتب عايز ايه ..
بدون اي شرح وافر منه
شكرا اوي على وجودك
منوراني :)
كلماتك جميله فعلا
بس لازم تعرف ان الزمن لا يعود للوراء
واللى بدا لازمله يوم مهما كان
وينتهى
دمت طيب
شكرا بسنت على التعليق
و أوافقك (مع بعض التحفظ) على رأيك
:-)
تسلم ايديك
وليه بس العذاب
يعني غاوي تعذب نفسك بيا
وتعذبني بيك؟
مش كفاية كل ما اشوفك
هتبقي عارف اني جوايا
اجري عليك وابوس كفوفك
كفاية حرام مش ناقصة عذاب
كفاية حب
كفاية عتاب
جميلة ومتعبة
وبلاش تسال السؤال ده تاني
لانه بجد صعب ومتعب
:)
حلوة يا ايهاب
JazzyLife
عجبني إسمك ده ..
انا مش من هواة الجاز اوي
بحب البلوز اكتر ..
نورت النوت و المكان مكانك
و ان كان حلو يبقى اتحلى بكلامك
متحرميناش من الطلة ده
:)
مسائك ورد
زي الفرحة ...
زي الفرصة بتهرب بعيد!!
لستُ من هواة العامية
بس حبيت آخر بوحاتك،
تقديري
ّ،
فنجان!
الغريب انك كالنسيم ..
تأتين تتلمسين الوجنات بسرعة
و تختفين !!!
....
و إكراما لوجودك
سأكتبها في البلوج
و لكنك انت من ستتحملين النقد
اتفقنا :)
مش حكاية انها مش ماشية مع الموضوع .. الحكاية اني حاسس انها (هي) مش ماشية مع حياتي كلها !!!
تصدق ؛ لقد اعتدت على الأمر، و لكنه ما زال يقتلني في كل مرة ..
إرسال تعليق