غرفة بعيده مقفول بابها
لا فيه قنديل ينور طرقتها
و لا حتى شويه نور في عتبتها
قالولك ..
في الغرفة ده .. الأمل
اللي انت مستنيه
و اللي انت بتدور عليه
باسوك ... طبطبوا عليك
و جنب الحيط حطوك
ضحكوا عليك
وقالولك استنى ..
ده الفرج جاي
و معاه شويه امل
ده اللي اسمه .. كلام هبل!!!
قالولك انت لسه مش شايف
مشوارك بعيد و مش عارف
قالوا عنك عبيط
و اجبروك تمسك ايديهم
عشان يعدوك الشارع الكبير
شدوك .. اوهموك انك ضعيف
كسروا لقمة من الرغيف
طفحوك اللقمة
و لبسوك العمة
باسوك ... و طبطبوا عليك
و جنب الحيط حطوك
ضحكوا عليك
شاوروا على الظلمة بعيد
و قالولك لسه مش سعيد
اهو واضح نور الامل
ماحدش شايفه غيرهم
ده اللي اسمه .. حاجه شلل!!!
ياللي فاكر نفسك معاهم
و ياللي فاكر نفسك مش معاهم
محدش هيغرف بايده و يديك
طبق العسل
كل واحد فيهم نفسه يرميك
و يكون البطل
نفض دماغك من افكارهم
كبر دماغك من اوهامهم
كن .. انت
ابني لك فكر غيرهم
يكون .. انت
و بوسهم ... طبطب عليهم
جنب الحيط حطهم
و اضحك عليهم
شاورلهم على قلبك
و قول موجود هنا العسل
مش شايفينه
ده اللي اسمه .. كلمة امل !!!
ليست هناك تعليقات:
إرسال تعليق