انا فاكر بالضبط

انا لسة فاكر بالضبط اول يوم
يومها قمت مهدود من النوم
فاكر بالضبط اني قمت الساعة اتنين
و الشمس ضاربه في وشي من ساعتين
مش قادر ارفع راسي و لو لحبه
كأني مانمتش بجد بقالي يومين
انا لسه فاكر بالضبط اني أكلت
شربت كوباية الشاي و نزلت
الدنيا يومها كانت فعلا حر
و الزحمة كانت قتل
انا لسة فاكر بالضبط لون العربية
اللي كانت تحت البيت مستنية
و أد ايه كان فيه التنك
لسه فاكر بالضبط كوبري ستانلي
و سلم زانليز .. و اذان العصر
انا لسه فاكر بالضبط اني استنيت
حوالي كده ساعتين
شربت نسكافية .. يمكن اتنين
انا لسه فاكر بالضبط صوت العربيات
و كم شاب قاعد و البنات
حتى كمان صوت الضحك و الهمس
و النظرات وقت السكات
انا لسه فاكر بالضبط لما شفتك
ربطة حجابك و طريقة لبسك
لون شفايفك و رمشك
انا لسه فاكر بالضبط اول ابتسامة
فاكر بالضبط سلامك
و الهمس اللي ف كلامك
و رعشة كفوفك
الكسوف اللي كان ف عيونك
انا لسة فاكر بالضبط ازاي فتحت ف الكلام
اطنان ... من الهيافة المسموعة
كلام عن الاكل و محشي العنب و الكوسة
عن الجو الجميل .. و الخ من العبط
و انا في الهبل ماقلكيش ... موسوعة
انا لسه فاكر بالضبط .. اني مافصلتش
اتكلمت كل الساعتين .. ماسكتش
عشان انت كنت اجمل واحدة قابلتها
قلبي و الله ما كدب و انا ما انكرتش
انا لسة فاكر بالضبط ... أد ايه كنت متكيّف
و انا ماشي جنبك
و اد ايه كان بيلاعبك الهوا
لما قلنا نتمشى سوا
لغاية ما يجي المكيّف
انا لسه فاكر بالضبط .. ملامح كمالك
لما المكيّف من بعيد جالك
انا لسة فاكر بالضبط قلبي
لما قالي عنك "يخربيت جمالك"
انا لسه فاكر بالضبط اني بجد
و في اول يوم شفتك ..

أد ايه أنا عشقتك

-----------------------------------------

الى ملاكي الاوحد و حبي الوحيد

** شيماء **