.
.
كلمني عن الاحلام .. الواقعية
الحلم اللي اقصاه .. حياة آدمية
ولاّ كلمني عن العيش بدون حياة
و عن انتظار مترو النهاية
كلمني عن الموت ف الغربة
و عن العذاب في الدنيا و الآخرة
عن تصريح الاقامة في مكانك
و عن تصريح تاني في مماتك
كلمني عن المرض اللي يجيك
لما تتعب العيال حواليك
كلمني عن هم الموت .. لما تموت
اللي هترميه على قلوب مواليك
كلمني عن جتتك لما تبرد
و لما تكون ملفوفه بالقماش
في الغرفه اللي فيها البلكونه
اللي انعدم فيها صوت النقاش
و صوت نهنه البنات
و البكى بلون السكات
كلمني عن الدفنه
و الشادر و الختمه
مين هيشيلك يا غلبان
على كتافه
و الدعا اللي ف المكان
و خلافه
كلمني عن بعد الموت
عن القبر اللي من غير صوت
كلمني عن الراحة و عدمها
في الدنيا ديه كانت
او ف التربه و عذابها
كلمني عن ... و لاّ بلاش
ماعدش في حاجه تفرق
تموت ليها .. أو تتعاش
الحقيقة معروفه لينا و مردوده
ماعدش لينا راحة موجوده
موت .. او عيش
ماببقتش تفرق
.
.
.
(تمت .. مؤقتا)
ليست هناك تعليقات:
إرسال تعليق